Algo tan importante como que o barrio de Oza-Gaiteira-Os Castros recolle no seu espazo boa parte das cicatrices da fonda transformación da cidade da Coruña no último século dende a anexión do Concello de Oza e incluíndo a ampliación do porto, o desenvolvemento urbanístico e as novas infraestruturas arredor das cales se organizou a vida do barrio é premisa abondo para desenvolver esta iniciativa, polo barrio e pola mesma cidade. Aínda hoxe hai veciñas e veciños que nos poden falar en primeira persoa do castelo de San Diego, dos ‘corralóns’, da barca das Xubias, da escala de Dona Angelita, da Estación do Norte, dos adoquíns da Nacional VI, da Praia do Lazareto… e emocionándose ao facelo. Por iso cremos que é importante rexistrar a súa memoria, arquivala, compartila e difundila para que as leccións do pasado sigan inspirando as decisións do noso presente.